Голландиянинг Эйндховен шаҳридаги “Indoor Sportcentrum Eindhoven” мажмуасида ўсмирлар, ёшлар ва катталар ўртасидаги G1 туркумига кирувчи мавсумнинг навбатдаги йирик турнири – 43-Lotto Dutch Open-2016 мусобақаси якунланди.

Ушбу нуфузли мусобақада жаҳоннинг энг етакчи ҳисобланган 1100 нафардан ортиқ таэквондо усталари қаторида Ўзбекистон терма жамоаси таэквондочилари ҳам катта таркиб билан иштирок этди.

-87 кг вазн тоифасида даянга чиққан ҳамюртимиз Жасур Бойқўзиев мусобақанинг бронза медалига сазовор бўлди.

+68 кг вазнда даянга чиққан Светлана Осипова олтин медални қўлга киритди. Энг оғир +87 кг вазн тоифасида амалдаги жаҳон чемпиони Дмитрий Шокин финалгача мағлубиятсиз етиб бориб, кумуш медал билан тақдирланди. Бу ҳақда olamsport.com хабар қилган.

-74 кг вазн тоифасида ўз имкониятини синовдан ўтказган Никита Рафалович эса халқаро турнирнинг бронза медалини қўлга киритди.

Эслатиб ўтамиз, Эйндховен даянларида Ўзбекистон спорт шарафини қизлардан Светлана Осипова (+68), Нигина Ражабова (-46), Гўзал Норбобоева (-53), Назокатхон Нажмиддинова (-53), Заря Қосимова (-53), Дилфуза Холбўтаева (-62), Нигора Турсунқулова (-67) ҳимоя қилишди.

Эркаклар терма жамоаси таркибидан эса Валентин Хегай (-54), Тимурбек Ўролов (-58), Шаҳбоз Шофайзиев (-68), Никита Рафалович (-74), Максим Рафалович (-80), Жасур Бойқўзиев (-87), Дмитрий Шокин (+87) жой олишганди.