Жорий йилнинг 1, 2, 8, 9, 10 апрель кунлари Алишер Навоий номидаги киносаройда “ҚВЗ битирувчилари” деб номланган концерт дастури бўлиб ўтади. Аҳамиятлиси шундаки, бундан бир неча йиллар аввал қатнашган турли олий ўқув юртлари жамоалари яна томошабинлар олдида ўз бадиий чиқишларини намойиш этишади. Жумладан, “Comedy.Uz”, “Дизайн”, “Омадли жентельменлар”, “Шаддод қизлар” ва бошқалар.

Олийгоҳларни битириб, бугун турли соҳаларда фаолият юритаётган собиқ “қвзчи”ларнинг чиқишлари, кўпчилик мухлислар учун қизиқ бўлиши табиий.

“Одамнинг табиатида ижодга мойиллик бўлса, барибир, у ўзини эслатаверади. Бу ижодий чанқоқликни беэътибор қолдириш яхши эмас. Биз шу ҳолатлар ва собиқ “қвзчи”ларнинг таклифи билан мазкур концерт дастурини ташкил этишга қарор қилдик. Бир неча йил танаффус қилган, ҳаётий тажрибаси ошган, бошқачароқ айтганда, “ижод тўрваси” янги “гаплар”га тўлган йигит-қизларнинг чиқишлари, ўйлайманки, қизиқ бўлади. Иштирокчилар астойдил тайёргарлик кўришмоқда”, дейди концерт режиссёри Шукрулло Маҳкамов.

Режиссёрнинг таъкидлашича, ҚВЗ профессионал лигаси ташкил этилмоқда. Энди бу лигада ижодий қобилияти шаклланган профессионал жамоалар қатнашиши мумкин бўлади.

“ҚВЗ битирувчилари” концерт дастурида янги ташкил этилган жамоаларнинг чиқишлари ҳам белгиланган. Ҳакамлар ҳайъати уларнинг чиқишларини баҳолаб, якунда лигада иштирок этиш-этмаслигини белгилаб беради.