Ўзбекистоннинг Туркиядаги элчихонаси 13 март куни Анқара шаҳрида юз берган теракт оқибатида жароҳатланганлар орасида Ўзбекистон фуқаролари мавжудлиги тўғрисидаги маълумотга эга эмас. Бу ҳақда Ўзбекистон Ташқи ишлар вазирлигининг ахборот хизмати хабар қилади.

"14 март ҳолатига кўра, Ўзбекистон Республикасининг Туркия Республикасидаги элчихонаси 13 март куни Анқара шаҳрида юз берган теракт оқибатида жароҳатланганлар орасида Ўзбекистон фуқаролари мавжудлиги тўғрисидаги маълумотга эга эмас", дейилади хабарда.

Эслатиб ўтамиз, 13 март куни маҳаллий вақт билан соат 18:43да, Анқаранинг Қизилой туманидаги автобус бекатларининг бирида, мамлакат бош вазирига қарашли офис яқинида, одамлар энг гавжум вақтида теракт содир этилди. Миналаштирилган автомобиль одамлар минган икки автобус ўртасида портлатилган. Туркия Соғлиқни сақлаш вазирлиги маълумотига кўра, ҳозирга қадар 37 киши ҳаётдан кўз юмган, 125 киши жароҳат олган, 71 киши касалхоналарда қолмоқда.