Украинада мамлакатнинг собиқ мудофаа вазирлари Михаиль Ежель ва Павел Лебедевга қидирув эълон қилинди. Бу ҳақда Украина бош прокурори ўринбосари, биринчи ҳарбий прокурор Анатолия Матиос хабар берган.

Унинг айтишича, айни вақтда Ежель Беларус Мудофаа вазирлиги таркибидаги даволаниш муассасасида бўлиб турибди. Ежель давлат мулкини ўмаришда айбланади.

Матиос Ежель ва Лебедевдан бошқа собиқ ҳарбий амалдорларга ҳам қидирув эълон қилингани ҳақида айтган. Жумладан, Бош штабнинг собиқ раҳбари Ильин. Бу адмирал жиноий ташкилот ташкил этиш ва дезертирликда айбланиши мумкин. Шунингдек, Украина Ҳарбий-денгиз кучллари контр-адмирали Березовский, унинг ўринбосари Шакура ҳамда вице-адмирал Елисеев давлатга хиёнат қилганликда гумон қилиниб, қидирувга берилган.

Ежель 2013 йилда ўша вақтдаги мамлакат президенти Виктор Янукович томонидан Украинанинг Беларусдаги элчиси сифатида тайинланганди. Бунгача у 2010-2012 йилларда мамлакат мудофаа вазири сифатида ишлаган. 2015 йилнинг апрелида Петро Порошенко Беларусдаги элчини ортга чақириб олиш ҳақида эълон қилган.

Павел Лебедев эса Николай Азаров ҳамда Виктор Янукович президентлиги даврида (2012 йилнинг декабридан 2014 йилнинг 27 февралигача) Мудофаа вазири сифатида ишлаган.