Германиянинг Дармштадт шаҳридаги Европанинг коинот парвозларини бошқариш маркази Марсга учирилган ExoMars коинот қурилмалари блоки “Бриз-М” тезлаштирувчи блокидан ажралгандан кейин унинг бошқарувини ўз назоратига олди, деб хабар бермоқда “Роскосмос” матбуот хизмати. Коинот моделлари алоқага чиқди, Марсга тўғри йўналишда кетмоқда, ундаги қуёш батареялари очилган ва қувватланмоқда, деб маълум қилди Европа коинот агентлиги (ЕКА) твиттерда. 

Бойқўнғир космодромидан фазога учирилган “Протон-М” ракета-ташувчиси илмий станцияни 15 март Тошкент вақти билан соат 01:13 да орбитага олиб чиққан. Бу парвоз Россия ракетасининг охирги 13 йил ичидаги ер атрофидаги орбитадан ташқарига биринчи муваффақиятли парвози бўлди.

Илмий станция Марсга октябрда етиб бориши керак. Марсга “Скиапарелли” десант модули ва Trace Gas Orbiter орбитал модули юборилди, улардан биринчиси қўниш технологиясини машқ қилади, иккинчиси эса сайёра атмосферасидаги газ аралашмалари, тупроқда музнинг тақсимланишини ўрганади ҳамда “Скиапарелли”дан олинадиган маълумотларни трансляция қилади.

ExoMars – “Роскосмос” ва ЕКА’нинг қўшма лойиҳаси бўлиб, ундан мақсад Марсда ҳаёт изларини қидириш, унинг атмосфераси, иқлими ва сиртини ўрганишдан иборат. Ишларнинг асосий қисми 2018 йилда ўтказилади. Ўшанда сайёрага уни ўрганиш билан шуғулланувчи марсоход юборилади. Марсоход олинган маълумотларни Ерга узатиб туради.