Миср Марказий банки 14 март куни Миср фунтини деярли 13 фоизга арзонлаштирди.

Шу кунда Миср Марказий банки банклар аро валюта кимошди савдосида бир Америка долларини 8,85 Миср фунтига тенглаштириб, 200 миллион долларни сотиб юборди.

Ушбу савдога қадар бир доллар 7,73 фунтга тенг эди, деб хабар беради vestifinance.ru.

Миср МБнинг расмий матбуот-релизида айтилишича, миллий валюта девальвацияси ҳақидаги қарор валюта бозорида талаб ва таклиф муносабатларини мўътадиллаштириш мақсадида қабул қилинди.

Хориж сармоялари ҳажмини оширишдан ташқари, Миср иқтисодиёти ҳолатига салбий таъсир этаётган доллар танқислиги муаммосини енгиллаштириш учун ҳам фунт қиймати пасайтирилди.

2011 йилдан бошлаб Мисрнинг валюта захираси 50 фоизга камайган. Сўнгги пайтларда унинг ҳажми 16 миллиард доллар даражада мўътадиллашди.

Мамлакат ҳудудида содир бўлган террорчилик ҳаракати ва россиялик сайёҳлар учаётган “Когалымавиа” авиакомпанияси лайнерининг портлаши оқибатида хориждан келадиган дам олувчилар сонининг кескин камайиши ҳам Миср иқтисодиётида валюта танқислиги муаммосини янада жиддийлаштирди.