Қирғизистонда ушбу йил мамлакат ҳудудида Шанхай ҳамкорлик ташкилоти (ШҲТ) “Тинчлик миссияси-2016”га аъзо давлатлар бўлинмалари билан қўшма ҳарбий амалиётлар ўтказиш учун тайёргарлик ишлари бошланди.

“Бугун (15 март, 2016) республика қуролли кучлари жанговор тайёргарлик Маркази базасида Қозоғистон, Хитой, Қирғизистон, Россия ва Тожикистон ҳарбий кучлари вакиллари иштрокида терроризмга қарши қўшма ҳарбий амалиётлар ўтказиш учун тайёргарлик кўриш масаласида музокаралар бошланди”, - деб маълум қилди Қирғизистон қуролли кучлари Бош штаби.

Режа бўйича, Бишкекдаги штаб музокаралари 17 март куни учрашув якуний протоколи билан ниҳоясига етади.
“Тинчлик миссияси-2016” терроризмга қарши қўшма ҳарбий-штаб ўқув амалиётлари бу йил Қирғизистон ҳудудида 5 сентябрдан 13 сентябргача 20636 ҳарбий қисм базасида бўлиб ўтади.

ШҲТ таркибига Қозоғистон, Хитой, Қирғизистон, Россия, Ўзбекистон ва Тожикистон давлатлари киради. Афғонистон, Ҳиндистон, Эрон, Мўғулистон ва Покистон мамлакатлари бу ташкилотда кузатувчи мақомига эга.