Россия президенти Владимир Путин 15 мартдан Суриядан Россиянинг асосий кучларини олиб чиқишни бошлашга буйруқ берди.

“Мудофаа вазирлиги олдига қўйилган вазифалар умуман олганда бажарилди, деб ҳисоблайман. Шунинг учун эртадан бизнинг Суриядаги ҳарбий гуруҳимизнинг асосий қисмини олиб чиқишни бошлашга буйруқ бераман”, деб айтди Путин ташқи ишлар вазири Сергей Лавров ва мудофаа вазири Сергей Шойгу билан учрашувда.

“Бизнинг ҳарбийлар, аскар ва зобитлар профессионаллик, уюшқоқлик, ўз ҳудудидан узоқда ҳарбий ишни ташкил қилиш уқувини кўрсатишди”, деб айтди президент.

Путиннинг айтишича, Россия операция давомида Сурияда кам бўлса ҳам, бироқ турли куч ва воситаларнинг самарали ҳарбий гуруҳини яратишга муваффақ бўлди.

Путин қўшинларнинг олиб чиқилиши Сурия сиёсий кучларининг музокара жараёни учун яхши рағбат бўлишига умид қилмоқда.

Путиннинг айтишича, Россиянинг Тартусдаги пункти ва Хмеймим базасидаги иши аввалгидек тартибда ишини давом эттиради. Путин қолган ҳарбийларнинг бир қисми ўт очишни тўхтатиш тартибига амал қилишни назорат қилиш билан шуғулланишини таъкидлади.

Ўз навбатида, Путин матбуот котиби Дмитрий Песков Путин ва Сурия президенти Башар Асад мамлакатдан қўшинларнинг олиб чиқилиши қарорини муҳокама қилганлари ва маъқуллаганларини айтган.

Асад Россияга террорчиликка қарши кураш ва Сурия халқига кўрсатаётган гуманитар кўмаги учун миннатдорчилик билдирди.

Россия мудофаа вазирининг айтишича, Россия қўшинлари Сурияда россиялик 2 мингдан кўпроқ жангари, жумладан 17 нафар дала қўмондонини йўқ қилган.