Россия президенти маъмурияти бошлиғи Сергей Ивановнинг маълум қилишича, Сурияда қолдириладиган россиялик ҳарбийларнинг хавфсизлиги таъминланади. Бу ҳақда ТАСС ахборот агентлиги хабар тарқатган.

"Биз қолдираётган контингент тўла хавфсизликда бўлади. Бўлинмалар ҳаводан, денгиздан ва қуруқликдан ҳимояда бўлади", дейди Иванов Россия Сурияда С-400 қолдириш-қолдирмаслиги ҳақидаги саволга жавобан.

Бундан ташқари, у Суриядаги Хмеймим ва Тартус базаларидаги объектларнинг қуруқлик ва ҳаводан ҳимоя қилиниши учун бўлинмалар қолдирилиши зарурати ҳақида гапирган.

Маълум бўлишича, Россиянинг мингга яқин ҳарбий хизматчиси Сурияда қолдирилади.

Россия ҳаво-космик кучлари томонидан Суриядаги операция якунланганидан сўнг, ҳарбий ҳаракатларнинг асосий оғирлиги ер усти операцияларига жалб қилинган қўшинлар зиммасига юкланади ва маслаҳатчилар аппаратининг ўрни оширилади.