Венесуэла президенти томонидан январь ойи ўртасида мамлакатда озиқ-овқат етишмовчилиги туфайли 60 кун муддатга эълон қилинган фавқулодда ҳолат муддати яна 60 кунга узайтириш ҳақидаги фармойиш қабул қилди. Бу ҳақда РИА «Новости» хабар тарқатган.

Президент Николас Мадуронинг бу ҳақдаги қарори ҳукумат расмий нашри бўлмиш Gaceta Oficial газетасида эълон қилинган.

Мадуро бу қарорини "Венесуэла аҳолисини иқтисодий урушдан ҳимоя қилиш" билан изоҳлаган.

Эндиликда Венесуэла Миллий ассамблеяси ушбу фармойишни 8 кун ичида муҳокама қилади.

Январь ойида қабул қилинган ҳужжатда аҳолини энг зарур маҳсулотлар билан таъминлаш, хусусий ва давлат компанияларига ишлаб чиқариш ҳажмини кўпайтириш талабини қўйиш, импорт шартларини ўзгартириш, солиқ тўлашдан қочишга қарши кураш ва бошқа чоралар кўзда тутилганди.

Венесуэладаги вазият инфляция ва давлат даромадлари пасайиши фонида юз бермоқда. Бунга нефть баҳоси тушиши сабаб бўлган. Мухолифат депутатларининг айтишича, мамлакатда асосий маҳсулотлар бўйича танқислик 87 фоизга етган. Озиқ-овқат соҳасидаги национализация қилинган ва ҳозирда маҳсулот ишлаб чиқармаётган корхоналар сони 300тани ташкил этган.