Суриядаги Хмеймим авиабазасидан Россия Ҳарбий-Космик кучларига тегишли самолётларнинг илк гуруҳи Россиядаги аэродромларга йўл олди. Бу ҳақда Россия мудофаа вазирлиги пресс-релизида маълум қилинган.

"Россия самолётларининг илк гуруҳи Хмеймимдаги авиабазадан Россия ҳудудига қайтмоқда. Таркибда "гуруҳ лидери" Ту-154, кўп функцияли Су-34 самолётлари жой олган", дейилади хабарда.

Беш минг километрдан узоққа амалга ошириладиган давомий парвозлар чоғида Россия самолётлари қўшимча ёқилғи олиш ва техник текширувдан ўтиш учун оралиқ қўнишларни амалга оширади. Шундан сўнг самолётлар доимий туриш учун Россиядаги аэродромга қўнади.

Эслатиб ўтамиз, Россия Федерацияси президенти Владимир Путин 15 март кунидан Россия қўшинларини Суриядан олиб чиқишни бошлашга буйруқ берди.