Режиссёр Стивен Спилберг Ҳаррисон Форд иштирокида Индиана Жонс саргузаштлари ҳақидаги бешинчи фильмни суратга олади. Бу ҳақда Disney компаниясидаги манбасига асосланиб, The Hollywood Reporter хабар тарқатган.

Фильмнинг аввалги қисми Paramount студияси томонидан ишланганди. Бешинчи қисмни суратга олиш ишлари билан эса Disney шуғулланади.

«Индиана Жонс — кинематография тарихидаги буюк қаҳрамонлардан биридир», — дейди Disney раҳбари Алан Хорн.

Янги картина қандай номда бўлиши айтилмаган. Бу фильм 2019 йилнинг 19 июлида прокатга чиқиши режалаштирилган. Қайд этиш керакки, бу вақтга бориб фильмни ижро этувчи актёр Ҳаррисон Форд 77 ёшга чиққан бўлади.

Бундан олдинроқ, Спилберг Britannia мукофотини топшириш маросими вақтида «Индиана Жонс — 5» фильмидан умидлари ҳақида гапириб ўтганди.