Коррупцияда айбланаётган Бразилиянинг собиқ президенти Инасиу Лула да Силва мамлакатнинг амалдаги президенти Дилма Руссеф маъмурияти штабининг бошлиғи этиб тайинланди, деб хабар бермоқда Reuters ахборот агентлиги.

Собиқ президентни бу лавозимга тайинлаш ҳақидаги фармон Official Gazette газетасининг махсус нашрида чоп этилди. Таъкидланишича, энди суд собиқ президентни коррупция иши бўйича жавобгарликка жалб қила олмайди.

Бир неча кун аввал да Силвага давлат структураларида, жумладан Petrobras давлат нефть компаниясидаги коррупция иши бўйича айблов эълон қилинганди.

Аввалроқ Бразилиянинг 3 млн га яқин аҳолиси амалдаги президент Дилма Руссеффнинг истеъфога кетишини талаб қилиб кўчаларга чиққани маълум қилинганди. Руссефнинг ўзи эса ҳеч ким қонуний сайланган президентнинг истеъфосини талаб қилиш ҳуқуқига эга эмаслигини айтган.