Курдларнинг "Курдистон озодлиги лочинлари" номли гуруҳи 13 март куни Анқара шаҳрида амалга оширилган ва 37 кишининг ўлимига сабаб бўлган теракт учун жавобгарликни ўз зиммасига олди. Бу ҳақда Рейтер агентлиги хабар тарқатган.

Ташкилот сайтида шу ҳақдаги матн нашр этилган.

Бу гуруҳ жангарилари 17 февраль куни Анқарада содир этилган ва 28 кишини ҳаётдан олиб кетган теракт учун ҳам жавобгарликни ўз зиммасига олганди.

Курдистон ишчилар партияси "Курдистон озодлиги лочинлари" гуруҳига алоқадорлигини инкор этган. Партия раҳбари Навоф Халил ўз одамлари тинч аҳолига қарши терактлар содир этиш билан шуғулланмаслигини билдирган.

Эслатиб ўтамиз, 13 март куни Анқара марказида, мамлакат бош вазири қароргоҳи жойлашган ҳудудда йўловчи автобуси олдига келган автомобиль портлади. Натижада 37 киши ҳалок бўлди ва 125 киши жароҳатланди. Теракт автомобиль ичидаги 24 ёшли талаба қиз ва унинг террорчи шериги томонидан амалга оширилган.