11 март куни Новочеркасск шаҳрида (Ростов вилояти) истиқомат қилувчи Игор Дижур автобус интервалларини ёзиб олиш учун эрталабки соат 6дан кечқурунги соат 5гача «Хотунок-2» бекатида автобус кутди. Бу ҳақида у DonDay маҳаллий нашрига сўзлаб берди.

“11 соат ичида шу бекатдан №37 (Ключевой — Бурляевка) ва №55 (Октябрьский — Донской) маршрутлари бўйлаб ҳаракатланувчи ҳеч қандай автобус ўтмади. Ваҳоланки бу маршрутлар ҳам шу бекат бўйлаб ўтишлари лозим”, дейди Дижур.

Бундай тажрибани у шаҳар ҳокими ўринбосари Игорь Политикнинг маҳаллий транспорт хизмати ҳақида депутатлар олдида сўзлаган нутқидан сўнг амалга оширишга қарор қилди. Маҳаллий аҳолининг шикоятларига ҳоким ўринбосари мунтазам текширувлар транспорт хизматининг сифатидан далолат беради, деб жавоб берганди.

Дижур унинг сўзларига ишонмасдан, вазиятни ўзи текшириб кўришни хоҳлаган. Ҳозир эса, у олинган ҳисоботни транспорт хизмати корхоналарига, депутатларга ва шаҳар маъмуриятига ҳамда Игорь Политикнинг ўзига ҳам топширишни режалаштирган.