Москвадаги Внуково халқаро аэропорти ходимлари туркияликлар билан келишган ҳолда Туркиядан ноқонуний маҳсулотлар олиб киришни йўлга қўйгани бўйича текширув олиб борилмоқда. Бир ой давомида бу канал орқали Россия ҳудудига 30 тонна миқдорида ноқонуний маҳсулотлар олиб ўтилгани айтилган. Бу ҳақда Россия Тергов қўмитасининг транспорт бўйича бўлими хабарида айтилган.

"Дастлабки маълумотларга кўра, Озарбайжон ва Туркия фуқароларидан иборат этник гуруҳ Внуково божхона хизмати ходимлари билан махфий тарзда келишиб, Туркиядан тижорий юклар олиб ўтилишини (йўловчиларнинг қўлларида) таъминлаган. Бу гуруҳ таркибида жами 20дан ортиқ киши бўлган. Бу юклар Истанбул-Москва рейслари орқали ташилган. Ҳар бир рейсда 100 кг юк ташилган. Улар "яшил коридор" яратишган. Бир ойда 30 тонна ноқонуний маҳсулот Россияга олиб кирилган", дейилади хабарда.

Россия Тергов қўмитаси 4 март куни Истанбул-Москва йўналишида учган 16 нафар йўловчини қўлга олганди. Улар текширув давомида 5 йилдан буён Истанбулдан Москвага тижорий юкларни ташиш билан шуғилланишганини тан олишган. Внуково аэропорти божхона хизматчилари билан ҳар куни 700-800 кг миқдоридаги юкни олиб ўтиш бўйича келишув тузилгани маълум қилинган.