Сирдарё вилояти, Гулистон шаҳридаги коллежлардан бирида ўқитувчи бўлиб ишлайдиган Жумагул (исмлар ўзгартирилган) кунлардан бирида Маҳталбек исмли йигит билан танишади. Унга ўзини Севара деб таништиради. Унинг бойвучча эканлигини англаб етган қиз, йигитни лаққа туширишни ният қилади.

Кунлардан бир куни унга бир рақам бериб, “Бу опамнинг рақамлари, менга қўнғироқ қилишингиздан қўрқаман. Эрим билиб қолиши мумкин”, дейди.

Бир неча кун ўтиб Маҳталбек Жумагул берган рақамга қўнғироқ қилади. Аммо гўшакни эркак киши кўтаради, қизни сўраган йигитни боплаб сўкиб беради. Орадан бир пас ўтиб, Жумагул йигитга қўнғироқ қилиб, тезда учрашишлари лозимлигини айтади.

Улар учрашишгач, қиз йигитга “бекор ҳалиги рақамга қўнғироқ қилибсиз, опамнинг қайнотаси кўтарибди. Опамнинг эри чет элда, ўғлига қўнғироқ қилиб, хотининг ўйнаш топибди, уйдан ҳайдайман деяпти. Масалани ҳал қилиш учун 400 доллар берасиз”, деб айтади.

Йигит пул беришдан бош тортади. Қиз агар унга пул бермаса, уйига бориб жанжал қилишини, уни зўрлаганини милицияга хабар беришини айтиб қўрқитади. Маҳталбек вазиятни вақтида тушуниб етиб, ички ишлар ходимларига мурожаат қилади.

Жумагулнинг қилмиши жиноят ишлари бўйича Гулистон шаҳар судида кўриб чиқилиб, тегишли жазо тайинланди.