Ер Соати – сайёранинг келажагига бефарқ эмасликнинг далили сифатида чироқлар ва электр қурилмаларни бир соатга ўчиришга ундовчи халқаро акция. Бу пайтда энг машҳур бинолар ва ёдгорликларнинг ҳам ёритгичлари ўчирилади.

2016 йилда Ер соати 19 март куни соат 20:30дан 21:30гача бўлади.

Ер Соати акциясидан мақсад электр қувватини тежаш эмас, балки табиатга ғамхўрлик билан муносабатда бўлишнинг ифодасидир. Йилдан-йилга ушбу тадбир табиатга масъулият билан муносабатда бўлиш заруратига эътибор жалб этиш имконини оширмоқда.

Бугунга келиб Ер Соати – ер юзидаги энг салмоқдор экологик акцияда дунё бўйлаб 2 миллиарддан ортиқ киши, 170тадан ортиқ мамлакат ва 7 мингтадан кўп шаҳар иштирок этади.

2007 йили Австралияда Ер Соати биринчи марта ташкил этилгандаёқ катта муваффақиятга эришган: ўшанда акцияда 2 миллиондан ортиқ одам қатнашган эди. Кейинги сафар Ер Соати тадбирларида дунёнинг 35 мамлакати иштирок этган.

Белгиланган соатда Римдаги Колизей, Сан-Францискодаги Олтин дарвоза ва бошқа кўплаб диққатга сазовор жойларда чироқлар сўнади. Йил сайин Ер Соати акциясига янги давлатлар қўшилмоқда ҳамда янада кўпроқ инсонлар табиатга бўлган эҳтиёткорона муносабатларини билдиришмоқда.