Alphabet холдингига кирувчи Google корпорацияси ўзининг роботлари билан танилган Boston Dynamics компаниясини сотувга қўймоқда. Бу ҳақда Bloomberg нашри хабар бермоқда.

Нашр маълумотларига кўра, компанияни Amazon ва Toyota компаниялари сотиб олиши мумкин.

Google компанияни уч йил аввал сотиб олган. Bloomberg’да таъкидланишича, холдинг раҳбарияти Boston Dynamics тижорат учун мўлжалланган маҳсулот чиқара олмайди ва бир неча йил ичида даромад келтира олмайди, деб ҳисоблаб уни сотувга қўйишга қарор қилган.

Boston Dynamics интернет фойдаланувчиларига анчагина “даҳшатли” кўринувчи роботлар чопаётгани, сакраётгани ҳамда муҳандислар томонидан “зўравонликларга” учраётгани тасвирланган кўплаб роликларидан таниш. Роботларга “зўравонликлар”: хоккей клюшкалари билан уларни туртиш, уларнинг қўлларидаги қутиларни уриб тушириш ва чалиш улар янги уқувларни ўрганиши учун қўлланади.