Буюк Британия ҳарбий кемалари яқин ойлар ичида Ливия қирғоқларига Европага муҳожирларни ўтказувчи ноқонуний ташувчилар билан курашиш учун юборилиши мумкин. Бу ҳақда Daily Telegraph нашри хабар бермоқда.

Нашрнинг Буюк Британия ҳукуматидаги манбалари маълумотларига кўра, Британия бош вазири Дэвид Кэмерон “Брюсселдаги саммитда ўзининг ҳамкасбларини Европа Иттифоқининг Ўртаер денгизидаги ҳарбий-денгиз кучлари Ливиядан Европага юз минглаб муҳожирларнинг келишини тўхтатиш учун ўз миссиясини кенгайтиришни истаётганидан хабардор қилган”. Британия ҳукуматида таъкидланишича, Ливия қирғоқларидан бевосита бир неча километр узоқликда муҳожирларнинг Европага ўтказилишини тўхтатиш учун кема, вертолёт ва бошқа техник воситалар жалб қилиниши мўлжалланмоқда.

Лондон 2015 йилда Ўртаер денгизига HMS Bulwark десант кемасини жўнатганди. Кема экипажи 2,9 мингдан кўпроқ муҳожирни денгизда ғарқ бўлишдан қутқариб қолган. Сўнгра бу кема HMS Enterprise кемаси билан алмаштирилган. Энди британияликлар ноқонуний ташувчиларнинг фаолиятини кузатиш ва унга чек қўйиш учун Ливия яқинида ҳаракатланишни режалаштиришмоқда.