"Тракторсози" билан учрашувдан кейин 3 кун дам олган футболчилар эртадан яна машғулотларга қайтишади. Бу ҳақда жамоа расмий сайтида хабар берилган.

Хабарда маълум қилинишича, Даврон Ҳошимов, Камолиддин Тожиев, Станислав Андреев, Жавоҳир Соҳибов, Жалолиддин Машарипов, Жамшид Искандеров ва Игорь Сергеев миллий терма жамоа таркибига жалб қилинган. Қолган футболчилар эса 19 март кунги машғулотда иштирок этишади.

Ёшлар таркиби ҳам тайёргарликни давом эттиради. Илҳом Мўминжонов шогирдлари бугун "Олмалиқ" ёшлари билан назорат ўйини ўтказишади. Биринчи лига жамоаси эса 20 март куни Ўзбекистон Кубогида "Сўғдиёна"га қарши майдонга тушади.