Пентагон раҳбари Эштон Картер 2017 йилги мудофаа бюджетини муҳокама қилиш давомида АҚШ хавфсизлигига раҳна солувчи 5 та глобал таҳдидни айтиб ўтди. У ушбу таҳдидлар орасида Россияни 1-ўринга қўйди. Бюджет лойиҳасида АҚШ армияси учун 582,7 млрд доллар сарфлаш таклиф қилинган.

Картер таҳдидлар рўйхатида Россиядан кейинги ўринларга Хитой, Шимолий Корея, Эрон ва халқаро террорчиликни қўйди. Бу ҳақда АҚШ мудофаа вазирлиги сайтидаги хабарда айтилди.

“Бугунги кунда хавфсизлик борасидаги вазият охирги 25 йил ичидагидан кескин фарқ қилади. У янги ёндашувларни талаб қилади”, деб айтди Картер. У Россия ва Хитойни қурол-аслаҳа тизимини ривожлантираётган ҳамда баъзи ҳудудларда АҚШнинг етакчилигини хавф остига қўяётган энг хавфли рақобатчилар сифатида таърифлади.

Картер 2017 йил учун 582,7 млрд долларлик ҳарбий бюджет сўрамоқда, бу маблағлардан 523,9 млрд доллари таянч бюджетни ташкил қилади, қолган 58,8 млрд доллар хорижда шошилинч операцияларни ўтказиш учун срафланади.