Ўзбекистон пойтахтидаги йўлларнинг умумий узунлиги, Тошкент ҳалқа автомобиль йўлини ҳисобга олмаганда, келгусида ҳозирги 630 километрдан 879 километрга ёки 40 фоизга узайтирилади. Бу ҳақда Тошкент Архитектура ва қурилиш бош бошқармаси бошлиғи в.б. Рустам Раҳматуллаев «Народное слово» нашрига берган интервьюсида маълум қилган.

Кўрсатиб ўтилган рақамлар турли даражадаги транспорт боғламаларини ҳам ўз ичига олади. Жумладан, Себзорда бунёд этилган боғламага ўхшаш иншоот Бунёдкор ва Муқимий кўчалари (метронинг «Новза», собиқ Ҳамза бекати) ҳамда Оҳангарон шоссеси ва Тошкент ҳалқа автомобиль йўли кесишмаларида («Роҳат» айланаси) ҳам қурилиши режалаштирилган.

Газета суҳбатдоши аниқ муддатларни маълум қилмаган. Фақатгина Роҳатдаги боғлама жорий йилда қурилишини айтиб ўтган.

Ҳозирги вақтда Ўзбекистон автомобиль йўлларининг умумий узунлиги 184 минг километрни ташкил қилади. 2016 йилда 513 километр йўл қурилиши ва таъмирланиши режалаштирилган. Спутник нашрида маълум қилинишича, бу ишларнинг умумий қиймати 1,3 миллиард сўмни ташкил қилади.