Яқин вақт ичида Тошкент аэропорти яқинида қарийб 800та машина тўхташи учун мўлжалланган кўп қаватли автомобиллар тураргоҳи пайдо бўлади. «Газета.uz» сайтида ёзилишича, бу ҳақда Тошкент меъморчилик ва қурилиш бош бошқармаси бошлиғи вазифасини бажарувчи Рустам Раҳматуллаев «Народное слово» газетасига берган интервьюсида маълум қилган.

Шунингдек, «Тошкент» марказий вокзали ва йирик бозор жойлашган пойтахт ипподроми яқинида ҳам 530 тадан ўринга эга автомобиль тураргоҳлари қурилади.

Рустам Раҳматуллаевнинг айтишича, Тошкентнинг турли туманларида жами 20дан ортиқ кўп қаватли гаражлар қуриш бўйича лойиҳалар тайёрланган. Уларнинг ҳар бири 500дан зиёд автомобилни сиғдира олиши кўзда тутилган. Шунингдек, бу автотураргоҳларда сервис хизмати мажмуасига ҳам бўлади.

Маълумот учун, айни вақтда Тошкент шаҳрида «Чорсу» бозори ёнида ва «Самарқанд дарвоза» савдо мажмуасида шундай кўп қаватли автотураргоҳлар мавжуд.