FlyDubai компаниясининг ижрочи директори Ғайт ал-Ғайтнинг маълум қилишича, Ростов-Дондаги ҳаво шароити Boeing 737-800 самолётининг парвозни давом эттиришига имкон берар даражада яхши бўлган. Бу ҳақда РИА Новости хабар тарқатди.

«Агар ҳаво ёмон бўлганида эди, самолёт учишга чиқмасди», — дейди у.

Бундан ташқари, айни вақтда ушбу самолёт ҳалокатга учрашдан олдин 2 соатдан ортиқ вақт давомида Ростовдаги аэропорт осмонида айланиб учиб, қўнишга урингани бўйича текширув олиб борилмоқда.

Компания вакилининг айтишича, бундай ҳолат одатий вазият эмас.

Қайд этиш керакки, самолёт биринчи уриниш муваффақиятсиз чиққанидан кейин аэропорт осмонида 2 соатдан ортиқ вақт давомида айланиб юрган. Бу вақтда эса самолёт бошқа аэродромга етиб олиши мумкин бўлган.

Эслатиб ўтамиз, 19 март, шанба куни FlyDubai авиакомпаниясига тегишли Boeing 737-800 лайнери Россиянинг Ростов-Дон шаҳри аэропортига қўниш вақтида ҳалокатга учради. Ҳодиса оқибатида самолёт бортида бўлган барча йўловчилар (55 киши) ва экипаж аъзолари (7 киши) ҳалок бўлган.

Ростовда қулаган Boeing самолёти 2 соатдан ортиқ вақт давомида қўнишга уринган

Россиялик учувчи: Ростовда Boeing учувчилари қўшимча харажатдан қочиш учун самолётни қўндиришга уринишган