Россия Атроф-муҳит вазирлиги вакили Николай Гудковнинг маълум қилишича, халқаро миқёсдаги «Ер Соати» акцияси Қизил майдонда Ростовда ҳалокатга учраган Boeing 737-800 қурбонлари хотирасига 1 дақиқа сукут сақлаш орқали бошланади.

"Барча кўнгилочар маросимлар бекор қилинган. Акция Ростов фожиасида ҳалок бўлганлар хотирасига бир дақиқа сукут сақлаш билан бошланади. Унда вазир Сергей Донской иштирок этади", деган Гудков.

Россия табиатни асраш фонди (WWF) матбуот хизмати котиби Людмила Лягушкина бундай тадбирлар Россиянинг бутун ҳудуди бўйлаб ўтказилиши режалаштирилганини маълум қилган.

«Ер Соати» акцияси – сайёранинг келажагига бефарқ эмасликнинг далили сифатида чироқлар ва электр қурилмаларни бир соатга ўчиришга ундовчи халқаро акция. Бу пайтда энг машҳур бинолар ва ёдгорликларнинг ҳам ёритгичлари ўчирилади.

2016 йилда «Ер Соати» акцияси 19 март куни соат 20:30дан 21:30гача бўлиб ўтади ва унда иштирок этиш кўнгилли бўлади.

«Ер Соати» акциясидан мақсад электр қувватини тежаш эмас, балки табиатга ғамхўрлик билан муносабатда бўлишнинг ифодасидир. Йилдан-йилга ушбу тадбир табиатга масъулият билан муносабатда бўлиш заруратига эътибор жалб этиш имконини оширмоқда.

19 март куни бутун ер юзида «Ер Соати» акцияси ўтказилади