Қозоғистоннинг Қарағанда шаҳридаги мактаблар ўқувчилари Minecraft компьютер ўйини ёрдамида таълим олмоқдалар, деб хабар бермоқда Tengrinews нашри.

Таъкидланишича, Ниғмат Нурмаков номидаги иқтидорли болалар учун мўлжалланган мактаб ўқувчилари бу оммавий ўйиндан биология, тарих, математика, информатика, география, физика ва кимё фанларини ўрганишда фойдаланмоқдалар. Ушбу ўқитиш методининг муаллифи мактабнинг биология ўқитувчиси Асхат Махметов бўлди.     

Махметов ўқувчилар билан биргаликда ўйинда мактаб биноси ва ундаги хоналар нусхасини яратишга қарор қилди.

“7-синф дастури бўйича биология дарсида ўқувчилар умуртқали ва умуртқасиз жонзотлар мавзусини ўтадилар, болалар ўйинда шундай жонзотларни топишлари керак. Кимёда парта ясаш топшириғини беришимиз мумкин, ўқувчилар бунинг учун керак бўладиган барча материалларни ўйинда ясашлари керак (дарахт чопиш, темир топиш). Тарих дарсида эса ўйинда қандайдир жангни ёки тарихий бинони тасвирлаш керак. Ўқувчилар душманлар ҳудудидини эгаллаш қоидасидан фойдаланган ҳолда, давлатлар, шаҳарлар номларини ва бошқа географик номланишларни ўрганадилар”, деб тушунтирмоқда ўқитувчи.

Таъкидланишича, ўқувчилар топшириқларни инглиз тилида олиб, уни шу тилда бажарадилар.

Minecraft ўйини ўйновчига уч фазоли ўлчамдаги, тўлиқ куб шаклларидан ташкил топган оламни яратишга ва уни эркин ҳолда қайта қуриш, кублардан мураккаб иншоотлар қуришга имкон беради. Ўйиннинг бу жиҳати уни LEGO болалар конструкторига ўхшаш қилади. Ўйин ўйновчи олдига бирор-бир мақсад қўймайди, бироқ унга катта имкониятлар ва машғулотлар таклиф қилади: мисол учун, ўйновчи оламни, турли иншоотлар ва буюмларни тадқиқ қилиши, турли рақиблар билан жанг қилиши мумкин.

Minecraft тарихдаги энг муваффақиятли компьютер ўйинларидан бири ҳисобланади: 2015 йил ёз ҳолатига кўра бу ўйин барча операцион тизимлар учун 70 млн нусхадан кўпроқ сотилган. Ўйин кўплаб мукофотларга сазовор бўлган.