Россияликлар интернетда кўпроқ вафот этган инсонлар, болалар ва ҳомиладорларга оид тушлар таъбирини қидириши маълум бўлди. Бу маълумот “Яндекс” компанияси томонидан шу йилнинг февраль ойи бўйича қидирувлар статистикаси асосида тайёрланди.

Ҳар ҳафта россиялик фойдаланувчилар “Яндекс”да “бу туш нимани англатади?” деган 300дан ортиқ сўровлар қолдиришади.

“Тушлар таркибига қараб турлича талқин қилинади. Қидирув сўровномаларида туш таъбирига оид мингга яқин белги ва ҳодисаларни учратиш мумкин: улар ичида энг оммалашгани – “бола”, “эр”, “йигит” кабилар билан кам учрайдиган – “чўртан”, “мева”, “эшик” каби сўзлар ҳам бор”, - дея қайд этди компания.

“Яндекс” рўйхатида бор-йўғи 25та ўрин мавжуд. Юқорида келтирилган сўровларга қараганда, россияликлар кўпроқ балиқлар пайдо бўлувчи тушларга қизиқтириши аниқланди. Шунингдек, улар иш, оила, собиқ муҳаббат, туғруқ, тўйга оид тушлар таъбирини ҳам кўп қидиришади.

“Тушлар ҳақида одатда, уйқудан уйғонгач, тонгда қидиришни бошлашади. Сўровларнинг энг қизиган вақти соат 9:00да бошланади”, - деб хабар беради “Яндекс”.

Компания мазкур статистикани Бутунжаҳон тушлар кунига бағишлаб тайёрлади. Бу кун 2008 йилдан бошлаб ҳар йили март ойининг иккинчи жумасида нишонланади. Бу кунни нишонлашдан кўзланган асосий мақсад соғлом уйқуни тарғиб қилиш ҳисобланади.