Россия туризм саноати иттифоқида маълум қилинишича, Ростов-Донда қулаб тушган Boeing самолёти Дубайга 140 нафар сайёҳни олиб қайтиши керак бўлган. Бу ҳақда ТАСС агентлиги Россия туризм саноати иттифоқи матбуот хизматига асосланиб хабар тарқатган.

"Биз бу самолёт бугун Ростов-Дондан Дубайга 140 нафар сайёҳни олиб қайтиши керак бўлган самолёт эканини аниқладик. Бу самолётга чиқиши керак бўлганларнинг кўпчилиги болалар. Ҳозир улар Кранснодарга автобусда кетишмоқда. У ерга FlyDubai авиакомпанияси бошқа самолёт жўнатади", дейди матбуот хизмати вакили.

Эслатиб ўтамиз, 19 март, шанба куни FlyDubai авиакомпаниясига тегишли Boeing 737-800 лайнери Россиянинг Ростов-Дон шаҳри аэропортига қўниш вақтида ҳалокатга учради.

Ҳодиса оқибатида самолёт бортида бўлган барча йўловчилар (55 киши) ва экипаж аъзолари (7 киши) ҳалок бўлган.