Археологлар Хитойда фанга маълум бўлган энг қадим тўғонларни аниқлашди. Улар Қадимги Мисрдаги дамбадан 0,7-1,1 минг йил олдин — бундан 4,7-5,1 минг йил олдин қурилган. Чжэцзянь археологик институти олимларининг ушбу тадқиқотини China Daily маълум қилган.

Ушбу тўғонлар ҳақида илк бор 1990 йилда маълум бўлган эди. Уларни тадқиқ қилиш ишлари 2015 йилнинг июнидан бошланиб, 2016 йилнинг январь ойига қадар давом этди. Бу даврга қадар археологлар 100 кв. км майдонда 11 дамбани қазиб ўрганишди.

Сақланиб қолган тўғонларнинг узунлиги 6,5 км. га чўзилган. Тўғонлар Янцзи дарёси қирғоқларидан топилган. Аммо олимлар уларни Қадимги Хитой аҳолиси нима мақсадда бунёд этганини аниқ айтиб бера олишмади. Уларнинг тахминича, қадимги одамлар уларни сув тошқинидан ҳимояланиш учун қуришган бўлиши мумкин.