Бразилиянинг Сан-Паулу шаҳрида кичик ўлчамдаги, енгил моторли самолётнинг 3 қаватли уй устига қулаши оқибатида самолёт ичидаги 7 киши ҳалок бўлди, деб хабар бермоқда El Nuevo Herald нашри.

Таъкидланишича, учувчи яқин атрофдаги аэродромга қўниш учун манёвр бажараётганда бошқарувни эплай олмай, уйнинг гаражига урилган.

Оқибатда самолётдаги 3 аёл ва 4 эркак ҳалок бўлган. Уй ичида бўлган бир аёл жароҳат олган.

Фалокатга учраган самолёт Vale тоғ-кон компаниясининг собиқ президенти Рожер Агнеллига тегишли бўлган. Агнеллининг ўзи ҳам самолётда бўлган, деб хабар бермоқда Globo нашри.

ОАВ маълумотларига кўра, самолётда тадбиркордан ташқари унинг рафиқаси ҳамда ўғил ва қиз фарзандлари турмуш ўртоқлари билан бирга бўлган.