Испания Примерасининг 30-турида Мадриднинг “Атлетико” клуби Хихонда маҳаллий “Спортинг”дан кутилмаганда мағлубиятга учради. Учрашувнинг 29-дақиқасида “матрасчилар” Антуан Гризманнинг голи эвазига ҳисобда олдинга чиқиб олдилар, бироқ ўйин тугашига саноқли дақиқалар қолганда, 10 дақиқа ичида 2 та тўп ўтказиб мағлубиятга учрадилар: 79-дақиқада Арнальдо Антонио Санабрия ҳисобни тенглаштирди, 89-дақиқада эса Карлос Кастро ғалаба тўпини киритди.

8 турдан бери ғалаба нималигини билмаётган ва охирги 4 ўйинни ютқазган “Спортинг” ниҳоят ғалабага эришиб, 27 очко тўплаб жадвалнинг охирги қаторини тарк этди ва 19-ўринга кўтарилиб олди. “Атлетико” эса 67 очко билан 2-ўринни эгалламоқда. Энди чемпионат етакчиси “Барселона” (75 очко) “Атлетико”дан янада ўзиб кетиши, 3-ўринда кетаётган “Реал” (63 очко) эса орадаги фарқни минимал кўринишга келтириши мумкин.

Испания Примераси, 30- тур
Спортинг Хихон – Атлетико М – 2:1
Голлар: Гризманн, 29 (0:1); Санабрия, 79 (1:1); Кастро, 89 (2:1).

 

Турнинг қолган учрашувлари қуйидагича якунланди:

Реал Сосьедад – Лас-Пальмас – 0:1
Голлар: Жозе, 39 (0:1).
Амалга оширилмаган пенальти: Виера, 13 (Лас-Пальмас).

Хетафе – Эйбар – 1:1
Голлар: Веласкес, 7 (1:0); Гонсалес, 87 (1:1).

Гранада – Райо Валекьано – 2:2
Голлар: Эл-Араби, 11 (1:0); Эрнандес, 45+2 (1:1); Эл-Араби, 54, пен. (2:1); Каштру, 87 (2:2).