19 март тунги пайт Ростов-Донда фалокатга учраган “Боинг 737-800” самолёти учувчининг самолётни навбатдаги даврага олиб кетмоқчи бўлганида қулаган. Бу ҳақда “Интерфакс” ахборот агентлигига фавқулодда хизматлардаги манба маълум қилди.

“Қўнишга бир неча дақиқа қолганда учувчи номаълум сабабга кўра қўниш ўрнига навбатдаги даврага кетишга қарор қилган, бироқ бунинг уддасидан чиқа олмаган”, деб айтди манба. Манбанинг таъкидлашича, фожиа терговининг барча иштирокчилари самолёт яна бир даврага кетиш вақтида ёмон об-ҳаво шароитини ҳисобга олган ҳолда самолётга катта юкланишлар тушгани версиясини кўриб чиқмоқдалар.

Манбанинг маълум қилишича, самолёт 900 метр баландликдан 300 км/соатдан каттароқ тезлик билан ерга тушган. “Экипаж фожиа олдидан фалокат сигнали бермаган ва носозликлар ҳақида хабар бермаган”, деб айтди манба.

Маълум қилинишича, самолёт тик қулаган ва “деярли тумшуғи билан ерга кириб кетган”. Самолётларнинг ҳаводаги вазияти ҳақида маълумотлар тақдим қилувчи Flightradar24 хизмати маълумотларига кўра, “Боинг” баландликка кўтарилиш вақтида қулаган. Бундан ташқари, об-ҳаво мутахассисларининг таъкидлашича, фожиа вақтида камдан-кам учрайдиган табиий ҳодиса – шамолнинг пурковчи оқими кузатилган.

Тергов фожианинг икки асосий версияси устида ишламоқда: учувчилар хатоси ва техник носозлик.