Дилшод Турдиев “Рио-2016” ўйинларига йўлланмани қўлга киритди

Юнон-рим кураши бўйича Ўзбекистон терма жамоаси аъзоси Дилшод Турдиев Қозоғистоннинг Остона шаҳрида шу йили Рио-де-Жанейро шаҳрида ўтказиладиган XXXI ёзги Олимпиада ўйинларига йўлланмалар ўйналаётган Осиё саралаш турнирида кумуш медалга сазовор бўлиб, “Рио-2016” ўйинларига йўлланмани қўлга киритди.

Оғирлик вазни 75 кг.гача бўлган полвонлар мусобақасида гиламга тушган тажрибали спортчи чорак финалда япониялик Шохей Ябикуни 9:0, ярим финалда қирғизистонлик Атабек Азисбековни 5:4 ҳисобида мағлуб этиб, ҳал қилувчи финалга чиқди.

Қоидага кўра, ушбу турнирда финалга қадар етиб келган спортчилар Олимпиада ўйинлари йўлланмасини қўлга киритишади. Ўз олдига қўйган асосий мақсадга эришган Дилшод ҳал қилувчи беллашувда кореялик Хьёнву Кимга имкониятни бой берди ва кумуш медаль совриндори бўлди.

Иккинчи кунги мусобақаларда гиламга тушган Ўзбекистон вакилларидан яна бири Мўминжон Абдуллаев (-130 кг) ҳам “Рио-2016” йўлланмасини қўлга киритишга жуда яқин келди. Чорак финалда япониялик Арата Сонодани 6:0 ҳисобида мағлуб этган спортчи, ярим финалда қирғизистонлик Мурат Рамоновга имкониятни бой бериб қўйди. Учинчи ўрин учун кечган баҳсда эса тожикистонлик Муроджон Тўйчиевдан устун келиб, бронза медали совриндори бўлди.

Биринчи кунги баҳсларда Рашид Қурбонов (-74 кг, эркин кураш), Зуҳра Мастонова (-53 кг, аёллар кураши) ва жароҳат олган Елмарат Тасмуратов ўрнига баҳсларга киришган Феруз Тўхтаев (-59 кг, юнон-рим кураши) бронза медалларига сазовор бўлган эди.

Шу тариқа, қитъавий саралаш мусобақаларининг икки кунлик якунларига кўра ўзбекистонлик спортчилар томонидан 1та кумуш ва 4та бронза медаллари қўлга киритилди.