Германия хорижда сақланаётган ўзига тегишли олтинни қайтариб олишни давом эттиради ва 2020 йилга қадар Германияда мамлакат олтин захираларининг ярми сақланади. Бу ҳақда Германия Марказий банки президенти Йенс Вайдман Fumke Group медиахолдингига берган интервьюсида маълум қилди.

Вайдманнинг айтишича, 2013 йилда Франкфурт-Майндаги омборга 11,5 млрд долларлик 366 тонна олтин қайтарилди. “Шу тариқа мамлакатда ҳозирла 1,4 минг тонна ёки олтин захираларимизнинг 41,5 фоизга яқини сақланмоқда”, деб айтди Вайдман.

Вайдманнинг таъкидлашича, Германия олтин захиралари қайтарилиши 2013 йилда Марказий банк томонидан қабул қилинган дастур доирасида амалга оширилмоқда. Дастурда олтинларнинг ҳақиқийлигини текшириш ва инвентаризация қилиш жараёнини соддалаштириш учун уларни мамлакатга босқичма-босқич қайтариш кўзда тутилган.

Ҳозирда олтин захиралари миқдори бўйича АҚШ дунёда етакчилик қилмоқда, у 8133,5 тонна олтинга эга. 2-ўринда 3381 тонна олтин билан Германия турибди.