Америкалик телебошловчи Жимми Киммел йўловчилар iPhone 5 ҳамда яқинда тақдим этилган iPhone SE ўртасидаги тафовутни аниқлай олишларини текшириб кўрди.

Киммел иштирокчиларга иккита смартфон, унинг сўзларига кўра, эски iPhone 5 ва iPhone SE беради. Аслида эса бу смартфонлар иккита бир хил iPhone 5 бўлади. Шунга қарамай, респондентлар улар орасидаги фарқни топишга “муваффақ” бўладилар.

Қатнашчиларнинг бири “янги” iPhone’нинг экрани ёрқинроқ эканини сезган бўлса, бошқа қатнашчилар ҳам дисплейнинг “яхшироқ” ва “тозароқ”лигини айтишди. Сўровда қатнашган яна бир қиз беш сонияда “iPhone SE”нинг батареяси ингичкароқ эканини аниқлади. Шунингдек, сўров давомида “янги” смартфоннинг тезроқ ишлаши ҳам “маълум” бўлди.

Apple компанияси 21 март куни iPhone SE смартфонини намойиш этган. Техник характеристикаларига кўра, у iPhone 5s корпусидаги iPhone 6s’га ўхшайди. Лекин бу мослама 3D Touch’га эга эмас.