АҚШ ҳукумати АҚШ ҳукумати ва қуролли кучлари компьютер тизимларига киберҳужум уюштирган "Сурия электрон армияси" хакерлар гуруҳининг 2 иштирокчисига айблов эълон қилди. АҚШ адлия вазирлигининг маълум қилишича, Федерал қидирувлар бюроси бу шахсларни энг хавфли жиноятчилар рўйхатига киритган ва уларнинг ҳар бири ҳақидаги маълумотга 100 минг доллар мукофот пули белгилади.

Тергов маълумотларига кўра, 22 ёшли Аҳмад Умар Аха ва 27 ёшли Фирас Дардор бир неча йил давомида АҚШ федерал муассасалари, жумладан Оқ уй, АҚШ армияси ва денгиз пиёда корпуси сайтларига ҳужум амалга ошириб келган. 2013 йил апрелда улар нуфузли ОАВлардан бирининг твиттердаги саҳифасида Оқ уйда бомба портлагани ва АҚШ президенти яралангани ҳақидаги ёлғон хабарни жойлаштиришган. Адлия вазирлиги матбуот хизматининг айтишича, уларнинг иккиси ҳам эҳтимол Сурияда яшашлари мумкин.

Виржиния штати судида бошқа моддалар бўйича 36 ёшли Питер Ромарга суриялик хакерлар гуруҳи иштирокчиси сифатида сиртдан айблов қўйилган. АҚШ бош прокурорининг миллий хавфсизлик бўйича ёрдамчиси Жон Карлиннинг таъкидлашича, "Сурия электрон армияси" гуруҳи ўз ҳаракатларини Сурия президенти Башар Асадни қўллаб-қувватлаш учун амалга оширишларини очиқчасига айтишган. Карлиннинг таъкидлашича, хакерлар ўзгаларнинг компьютер тармоқларига ноқонуний кириб, бойиш мақсадида товламачилик ва пул ювиш билан шуғулланишга уринишган.