АҚШ президенти лавозимига номзод ва АҚШнинг собиқ Давлат котиби АҚШ ва унинг иттифоқчилари Брюсселдаги терактлардан кейин биргаликдаги разведка соҳасида яхшироқ ишлашлари кераклигини айтди. Бу ҳақда Клинтоннинг MSNBC ва CNN телеканаллари эфиридаги шарҳларига иқтибос келтирган ҳолда Reuters ахборот агентлиги хабар бермоқда.

Клинтоннинг таъкидлашича, чегаралар ва аэропортлар ёпилиши, чегарада катта деворнинг қурилиши ҳам терррорчилар хуружидан сақлай олмайди, чунки террорчилик гуруҳлари борган сари янги технологияларни фаолроқ ва муваффақиятли эгалламоқда.

"Бетон девор интернетни тўхтата олмайди", деб айтди Клинтон.

Клинтоннинг айтишича, аэропортлар, вокзал ва бошқа нозик жойларда хавфсизлик даражасини ошириш лозим.

Клинтон АҚШлик амалдорларни АҚШ гўёки бутун бошли динга қарши уруш ҳолатида турганини англатувчи ҳаракатлар ва нутқлардан қочишга чақирди, унинг фикрича бу нафақат нотўғри, балки хавфли ҳамдир. Клинтон АҚШ террорчилар билан курашаётган кўплаб ислом давлатлари билан ҳамкорлик қилишини эслатиб ўтди.

Клинтон АҚШ бошчилигидаги коалиция ИШИД томонидан Ироқ, Сурия ва Ливияда босиб олинган ҳудудлар қайтарилмагунча, у билан курашда муваффақиятга эриша олмаслигини айтди.