Ўзбекистон Президенти фармонига асосан Саидкамол Ходжаев Ўзбекистон Республикаси Марказий банки раисининг биринчи ўринбосари этиб тайинланди. Бу ҳақда Марказий банк матбуот хизмати хабар қилди.

У мазкур лавозимда 2010 йилдан буён фаолият кўрсатиб келаётган Улуғбек Мустафоевнинг ўрнини эгаллади.

1979 йида туғилган Саидкамол Ходжаев 2014 йилнинг декабридан «Ўзсаноатқурилишбанк» АТБ бошқаруви раиси вазифасида ишлаган. Банк тизимидаги фаолиятини 1997 йилда оддий мутахассисликдан бошлаган.

Саидкамол Саидкаримович Ходжаев 2003 йили Тошкент молия институтининг банк иши факультетини тамомлаган. 2007 йили Ўзбекистон Республикаси Президенти ҳузуридаги Давлат ва жамият қурилиши академиясини тугатган.