Бельгиялик мусулмонлар 22 март куни содир бўлган терактни оғриқ ва алам билан қабул қилишди.

“Чин эътиқод” учун курашни мақсад қилиб олган террорчилар амалга ошираётган беъмани ваҳшийлик ва зўравонликларнинг ислом динига ҳеч қандай алоқаси йўқ, деб эътироф этмоқда дин вакиллари.

Содир бўлган фожиани инобатга олиб, европалик мусулмонлар уларга нисбатан муносабатнинг ёмон тарафга ўзгаришидан хавотир олишмоқда.

Брюсселда марокашликлар ошхонасини юритувчи Муборакнинг сўзларига кўра, экстремистларнинг одамзотдан нафратланиш мафкурасини ислом билан битта деб ҳисоблаш ноўрин: зўравонликнинг дини бўлмайди.

22 март куни Брюссель аэропортида ўзини портлатган худкуш террорчи Нажим Лаҳравий ҳам аҳолисининг деярли ярми мусулмонлар бўлган Скарбек коммунасида истиқомат қилган. Энди Скарбекда яшайдиган мусулмонларнинг тинчи бузилган, тез-тез полициячилар келиб тинтув ўтказади, журналистлар келиб сўроқ-савол уюштиришади.

Бельгия мусулмонлар Ижроия кенгаши раиси Салаҳ Эшаллавий ҳам мамлакат аҳолисини бирдамликка чорлади.

Социологларнинг баҳолашига кўра, мамлакатдаги мусулмонларнинг сони 620 мингдан ортиқ кишини ёки Бельгия аҳолисининг 5,8 фоизини ташкил этади.

Бельгиядаги масжидларнинг сони 320дан ортиқ.

Демографларнинг ҳисобига кўра, 2030 йилга бориб, Бельгиядаги мусулмонларнинг сони 1 миллионга етади.