Охирги вақт америкалик машҳур боксчи Флойд Мейвезер қозоғистонлик боксчи Геннадий Головкин ҳақида кўп гапирмоқда. Бу ҳақда Boxingnews24.com нашри ёзмоқда.

Флойд катта боксга 2016 йилда бўлмаса ҳам, 2017 йилда қайтиши мумкинлигини инкор этиб бўлмайди. Гапларга қараганда, америкалик ўзининг кетма-кет 50-ғалабасини айнан Головкин устидан қозонмоқчи.

Мейвезер ўз жанглари учун доимо жарангдор номли боксчиларни қидиришга ҳаракат қилган. Бу гал унга Сауль Альварес, Амир Хон, Кейт Терман, Кел Брук ёки Мэнни Пакьяо билан жанглар катта шуҳрат ва пул олиб келмайди, шунинг учун унга Головкин, яъни дунё саҳнасида бенуқсон шон-шараф қозонган спортчи керак.

Эслатиб ўтамиз, Головкин 23 апрелда Лос-Анжелесда Доминик Уэйд, кузда эса Саул Альварес билан жанг қилади.

Флойд Мейвезер ҳисобида ҳозирда 49 та жангдан 49 та ғалаба бор. Головкин ҳам ҳали бирорта жангида мағлубиятга учрамаган, унинг ҳисобида 34 та ғалаба бор.