АҚШ ҳукумати эронлик хакерларни бир нечта АҚШ банклари ва Нью-Йоркдаги тўғонга ҳужум қилишда айбламоқда, деб хабар бермоқда Reuters ахборот агентлиги.

Маълум қилинишича, бу ҳужумлар 2012 ва 2013 йилларда содир этилган.

Компьютерларга ноқонуний кирганликда айбланаётган бир неча эронликларга АҚШ адлия вазирлиги номидан айблов ҳукми эълон қилинди. Шунингдек, ҳукмда хакерларнинг Эрон ҳукумати билан алоқаси борлиги кўрсатилади. Маълум қилинишича, хакерларнинг барчаси Эронда яшайди.

Хакерлар Нью-Йоркдаги Bowman Avenue тўғони компьютер тизимига уяли модем орқали киришган. Таъкидланишича, эронликларнинг ҳужумига Bank of America, JPMorgan Chase, Capital One, PNC Financial Services and SunTrust Bank каби молия ташкилотлари ҳам учраган.

Аввалроқ АҚШ президенти лавозимига номзод Хиллари Клинтон Эрон АҚШга хакерлик ҳужумларини қўллаб-қувватлашини таъкидлаганди.