Янги Зеландияда давлат байроғи алмаштириш бўйича референдум ўтказилди.

СВС нашри хабарига кўра, референдумда аҳолининг кўпчилик қисми давлат байроғи ўзгартирилишига қарши овоз берган. Аниқлик киритилишича, референдумда қатнашганларнинг 57 фоизи эски байроқ сақланиб қолишини ёқлаб овоз берган.

Ўз навбатида, сайловчиларнинг 43 фоизи альтернатив вариант қора-кўк фондаги "Кумушранг қирққулоқ " номини олган янги кўринишдаги байроқ жорий этилишини истаган. Бу вариант ўтган йил давомида 2 босқичда бўлиб ўтган овоз бериш якунлари бўйича танланганди.

Мамлакат бош вазири Жон Кей Янги Зеландия давлат байроғини алмаштиришни 2014 йил сентябрида таклиф этганди. Бу ғояга байроқ яратилишида Буюк Британия байроғидан нусха олингани ва у Австралия байроғига жуда ўхшаш экани сабаб сифатида келтирилганди.