Украина Миллий банки миллий валюта – гривна купюраларини зиғирпоя толасидан босишни бошлади, дейилмоқда Украина Миллий банки расмий хабарида. Бундай банкноталарнинг биринчи партияси Житомир вилоятининг Малина шаҳрида босиб чиқарилди.

"Украиналик мутахассислар анчадан бери пул қоғозида пахтадан ташқари бошқа табиий ўсимлик толалари, масалан, зиғирни қўллашнинг мақсадга мувофиқлиги ҳақида фикр юритишаётган эди", деб айтди Миллий банк раҳбари ўринбосари Яков Смолий.

Унинг айтишича, зиғирпоя толасининг табиий хусусиятлари механик мустаҳкамлиги бўйича пахтадан анча юқорироқдир, бу эса қоғознинг яхшироқ чидамлилигини таъминлайди.

Смолийнинг таъкидлашича, банкноталарни тайёрлашда пахта ўрнига бошқа материалдан фойдаланиш ғояси оригиналдир, бироқ камёб эмас. Унинг айтишича, қоғоз пулларни тайёрлашда гуруч шираси ёки манила каноптоласи (банансимонлар оиласига мансуб ўсимликлардан олинадиган дағал қотиб қолган тола) толалари ишлатилгани ҳолатлари ҳам бўлган.

Украина Миллий банки зарбхонаси янги қоғозни қоғоз пулларга қўйиладиган талабларга мувофиқлигини текшириш учун синовдан ўтказмоқда.