ИШИД жангарилари 24 мартдан 25 мартга ўтар кечаси Пальмирада Сурия армиясига қарши кимёвий қурол қўллади. Бу ҳақда "Русская весна"портали хабар бермоқда.

Жангарилар Сурия ҳукумат қўшинларининг Жабал-Ҳайя тоғидаги позицияларига тахминларча сариқ фосфор солинган 5 та артиллерия снарядини отган. Портал маълумотларига кўра, кимёвий ҳужум оқибатида 7 нафар ҳарбий заҳарланиш ва куйишлар олган.

Сурия қўшинлари иттифоқчи тузилмалар кўмагида қадимий шаҳарда жангарилар позицияларига ҳужумни давом эттирмоқда ва унинг каттагина қисмини ўз назоратига олишга муваффақ бўлди.

Тозаланмаган оқ фосфор сариқ фосфор деб аталади, бу модда жуда заҳарли ҳисобланади. Ҳавода оксидланиб, ўз-ўзидан алангаланиб кетади. Сариқ фосфор ёнганда чиқадиган буғлар кўзларни, нафас йўлларини қаттиқ яллиғлантиради, терини куйдиради.