Кенияда жангарилар ҳужуми ҳақидаги ёлғон сигнал оқибатида юзага келган саросима вақтида камида 38 талаба жароҳатланди. Бу ҳақда 25 мартда Associated Press ахборот агентлиги маълум қилди.

Ушбу нохуш воқеа мамлакат пойтахти Найроби яқинидаги университетда юз берди. Талабалар ўз курсдошларининг ҳайқириғини эшитишгач, университетга жангарилар ҳужум қилди, деб ўйлашган. Шу сабабли бинода тиқилинч юзага келган, кўплаб талабалар юқори қаватлар деразаларидан пастга сакрай бошлашган.

2015 йил апрелда "Аш-Шабоб" жангарилари мамлакатнинг шимолида жойлашган Гарисса шаҳридаги университет ётоқхонасига ҳужум қилгани оқибатида 147 киши ҳалок бўлиб, 79 киши яраланганди. Махсус кучлар гаровга олинган 587 талабани озод қилишга муваффақ бўлган. Ҳужумни уюштирган барча 4 нафар жангари йўқ қилинганди.

"Аш-Шабоб" террорчилик гуруҳи шариат қонунлари билан яшовчи жамиятни яратишни ўз олдига мақсад қилиб қўйган.