Қозоғистон президенти Нурсултон Назарбоев на иқтисодиётда ва на геосиёсатда ечимлар осон бўлмаслигидан огоҳлантирди. Унинг айтишича, бу энг аввало юзага келган иқтисодий ва ижтимоий таназзул билан боғлиқ ҳисобланади.

"Бутун дунё миқёсида кенг қамровли инқироз авж олмоқда. Биринчидан, жаҳондаги беқарор молиявий ва савдо-сотиқ бозорлари Қозоғистон иқтисодиётига салбий таъсир кўрсатмоқда. Иккинчидан, ҳаттоки нисбатан фаровон давлатларда ҳам турли ижтимоий муаммолар уюми ўсиб бормоқда", - деди давлат раҳбари.

Унинг сўзларига кўра, Қозоғистон олдиндан узоқ муддатли стратегиялар ва дастурлар ишлаб чиқишни йўлга қўйган. Ушбу дастурлар мураккаб вазифаларнинг ечимини топишга қаратилган.

Назарбоев янги парламент олдига қатор вазифаларни қўйиб, ягона солиқ ва божхона кодексини қабул қилишга чақирди.

Қозоғистонда 20 март куни Миллий парламентнинг навбатдан ташқари депутатлар сайлови бўлиб ўтди. Унда иштирок этган 6та партия ичидан 3таси: президент бошчилигидаги "Нур Отан" (Юрт нури) партияси, "Ак жол" (Оқ йўл) Қозоғистон Демократик партияси ҳамда ҚХКП Қозоғистон Халқаро Коммунистик партиялари устунликка эга бўлди. Сайловчиларнинг 82,2 фоизи овоз берган ҳукумат партияси қуйи палатада 107та ўриндан 84тасини қўлга киритди.