Собир Умаров “Нексия” автоуловини навбатга турмай тезроқ ва арзонроқ сотиб олиш мақсадида Юнус исмли (исм-шарифлар ўзгартирилган) машина таъмирловчи таниш устага мурожаат қилди. Барчаси ана шундан бошланди. Бу ҳақда “Огоҳ” нашри ёзмоқда.

Собир ва Юнус ўртасидаги суҳбатни тасодифан Ильяс Закиев исмли нусха эшитиб қолади. Орадан бир муддат вақт ўтиб, у Юнус орқали Тошкент шаҳри, Серегли туманидаги автосалондан “Нексия” олиб бера олишини Юнус орқали Собирга етказади.

Ильяснинг гапига ишонган Собир у сўраган 500 АҚШ доллари ҳамда паспорти нусхасини унга беради. Эртасига Ильяс ундан шартномага деб яна 1000 АҚШ доллари миқдорида пул олади. Ўша куни уччовлон автасалонга боришади. У ерга кириб чиққан Ильяс машина 20-25 кун ичида чиқишини айтиб, 11 200 АҚШ доллари пул сўрайди.

Бу пулларни топиб бера олмаган Собир, берган пулларини ҳам қайтариб ололмаслигини билгач, сўм ҳисобида 28 миллион 854 минг пулни Ильясга беради.

Табиийки, машина салондан чиқмайди. Собир Ильясни қистовга олади. Аммо фирибгар турли баҳоналар билан қочиб юради. Собир Юнусга мурожаат қилади. Аммо Юнуснинг ҳам Ильяс билан тили бир эди. Собирнинг сўнгги чораси қолади, у ички ишлар идорасига мурожаат қилади.

Суд И.Закиев ва Ю.Рўзиқулов содир этган жиноятлари учун ўз ҳукмини ўқиди.