Багама оролларидаги Нассау аэропортида JetBlue авиакомпаниясининг Embraer ERJ-190 самолёти авариявий қўнишни амалга оширди. Самолёт экипаж қўниш вақтида шассини очолмагани сабабли учиш-қўниш полосасига таги билан урилиб қўнди. Бу ҳақда BNO News хабар бермоқда.

Маълум қилинишича, самолётда 95 нафар йўловчи ва экипажнинг 4 аъзоси бўлган.

Воқеа жойига етиб келган ўт ўчирувчилар самолётнинг олд қисмида чиққан ёнғиннинг авж олишига йўл қўйишмади.

JetBlue авиакомпанияси вакили Тамара Янг нохуш воқеа оқибатида ҳеч ким жабрланмаганини маълум қилди.