24 мартда Бельгияда "Тианж" атом электростанцияси хавфсизлик хизмати ходими террорчилар томонидан ўлдириб кетилган. Агент Шарлеруа шаҳрида ўлдирилган. Қотиллар эркакнинг АЭСга кириш учун рухсатномасини ўғирлаб кетишган. Derniere heure газетасининг маълумотларига кўра, АЭС Бельгияда террорчиларнинг бош мўлжали бўлган.

"АЭС хавфсизлик ходими 24 мартда ити билан сайр қилиб юрганда ўлдириб кетилган. Бу жиноятга ОАВда деярли эътибор берилмаган, бироқ маҳаллий полициядаги манбалар эркакнинг рухсатномаси ўғирлаб кетилганини тасдиқлашди", деб маълум қилди нашр.

Эътиборлиси, эркакнинг ўлдирилиши билан бир қаторда мутассадилар 11 нафар ходимнинг станцияга кириш учун рухсатномасини олиб қўйган.

Газета маълумотларига кўра, Брюсселда теракт амалга оширган террорчилар АЭСда қўпорувчилик амалга оширмоқчи бўлган, бироқ ҳуқуқ-тартибот муассасаларининг кучайтирилган рейдлари сабабли ўз режаларини ўзгартирган.

22 мартда Брюсселда террорчилар аэропорт ва метрога бир қатор ҳужумлар уюштирди. Терактлар оқибатида 31 киши ҳалок бўлди, 316 киши яраланди. Терактлар учун жавобгарликни ИШИД ўз зиммасига олди.